霧視法 - 拋棄你的近視眼鏡

霧視法 - 拋棄你的近視眼鏡 

1. 今日想介紹一下霧視法，點樣應用。「如霧起暗暗蓋掩身邊你，像霧裡 面前幻化不定」 呢個方便叫霧視法，就係睇野好朦咁解。眼鏡有正視鏡同負鏡之分，正視鏡就係凸透鏡，即係遠視鏡。負鏡即係凹透鏡，又叫近視鏡。霧視法就係要用一副唔岩度數嘅眼鏡，去呃自己嘅雙眼。

2. 首先要明白眼鏡片嘅原理。鏡片可以形成虛像(virtual image)或許實像(real image)，虛像和實像係咩呢? 實像就係可以投射到係平面(屏幕)上面，例如投影機嘅投影光線，虛像就係欺騙我哋嘅大腦以為件實物喺嗰度，其實唔係喺嗰度，例如我地照鏡見到自己嘅鏡像。咁我哋戴嘅眼鏡，無論係遠視定近視鏡見到都係虛像。眼鏡片將物件折射後，會將物件變大或變小，拉遠拉近黎呃我哋睇清楚啲。原理可以睇下附圖。圖片來源https://wancat.cc

3. 總括而言近視鏡(負鏡)就係將物件拉近變細，度數越高就越近越細。遠視鏡(正鏡)就係將物件拉遠變大，度數越高就越遠越大。

4. 喺之前「你戴錯眼鏡啦」一書同我哋嘅結論，近視越來越深嘅幕後黑手就係近視鏡(負鏡)，因為佢不斷將物件拉近，令到睫狀肌等一系列肌腱拉緊(strain)。當拉緊時間太長肌腱不懂放鬆，就會形成近視。我覺得好類似我哋少做手腳拉筋時，有啲位我哋會好難去得到，好似彎腰掂腳趾咁，掂到都會好痛，肌腱拉長唔到去嗰啲位。霧視法即係做相反嘅嘢，用正視鏡將虛像拉後變大，睫狀肌放鬆。以下是作者對戴不同鏡看東西所需要用嘅力去調節睫狀肌。

5. 所以作者並不反對使用正確負鏡來看遠的東西，但是看近時仍然使用近視鏡就會把影像拉得更近導致眼肌需要用更大的力去看近的東西。

6.如果有使用呢個方法嘅人，輕度近視或無近視 ，就可使用遠視鏡。若近視度數深就可用度數究較低参近視鏡。

7. 下表為鏡片度數與遠點距離的對應表，遠點距離就是可以清楚的最遠距離，超過遠點的影像就會變得模糊。資料來源：預防近視網

而各近視度數的患者則可以參照下表去選擇適合的閱讀鏡度數。資料來源：預防近視網

8. 而另外一本神書就係「重新學習看」(Relearning to see -- Improving Your Eyesight Naturally!) 喺第4章亦指出 The Problem with Glasses and Contact Lens. 第5章就提出Reduced Prescription 亦即係利用減輕度數嘅眼鏡去改善眼力。當中闡述貝茲 (Bates) 對減近視時眼鏡嘅看法。最有效就是完全唔戴，但書中記述用減輕度數嘅眼鏡亦有改善，只是需時較長。

9. 我就是佩左副二百度近視鏡代替原本五百多度嘅近視鏡，只是在有需要時使用，如工作或買外賣時要看 MENU 等時才戴上 。其他時間一律唔戴。試過就知唔戴係好 free 的，試過就返唔到轉頭。

10. 實行嘅時候一定會有好大壓力，難點係嚟自你睇嘢好矇嘅恐懼，例如過馬路嘅時候, 等巴士嘅時候，遠處望唔到熟人嘅樣咁。其實就算我五百多度唔戴眼鏡過馬路，你都係睇到架車的，因為你唔係盲左，正常人都分到有無車嚟梗。但係夜晚就要小心，有機會係個司機無開車頭燈，你就真係可能會睇唔到啦。

11. 「你戴錯眼鏡啦」一書作者認為霧視法有效消滅早期近視，叫佢做痙攣性近視。而已定型嘅近視患者只可以停止加深近視度數或少量減少度數。

12. 我對於霧視法嘅睇睇法就係覺得佢係相當有用。幫助好大，喺完全唔戴眼鏡嘅情況下，好多嘢日常生活上嘅嘢係做唔到嘅，對減近視嘅過程中造成極大障礙。

13。所以減近視第一步就係要拋掉度數最啱嘅眼鏡，配一副俾現在少200至300度嘅眼鏡，或者用自己多年前副舊眼鏡都得，如果未掉嘅話。啱度數嗰副只用黎做對安全要求高嘅工作才用，好似揸車咁。呢個做法我諗可能都要下好大決心。但要改變幾十年嘅習慣，呢個係必須的。

14.下一篇再來就是講下最重要嘅貝茲法 (Bates' method)。

https://www.facebook.com/近視恢復法-水鏡森美-112716571467967/

究竟咩係近視? 成因又係咩呢?

1. 今日想講下一個好似人人都知嘅Facts -- 近視既成因。我哋好似好清楚近視既成因，但其實又好似唔知點解會有近視。如果唔係我就唔會有近視啦。 我哋細細個開始已經日日俾阿媽鬧 「唔好咁近睇電視呀，坐後啲呀」，做功課時又鬧「坐直啲呀」，睇書時又鬧「唔好瞓喺度睇呀」，要開枱燈先夠光咁呀。係咪呢? 但係就算我哋盡量跟足，我哋仍然有近視。

2. 又有啲乜乜磚家出黎講，每睇近嘢30分鐘呀15分鐘，要睇返啲遠嘢5至10分鐘休息下，最好係綠色添。你做唔到，所以咪有近視囉。如果你真係可以跟到，話我知。呢個係一個不可能嘅任務。既然無人做到，又點解只係得我同一部份人有,其他人又無事呢?

3.科學學術上講嘅原因，我諗大家都知，中學Physics, Bio 都有學，仲叻過我添，都唔使我多講。科學上就係物件通過咩晶狀體呀,房水呀等等，但不能夠聚焦在視網膜上面，而係聚焦在視網膜前面，所以就朦喇。通常講嘅原因就係眼球過長呀，睫狀肌控制唔到晶狀體嘅厚薄咁。講到真係一部相機咁，對唔到焦就唔清，但係又其實無一個具體原因，營養不良?中左病毒?點解會形成呢個問題呢? 事實又係咪真係咁簡單呢? 最後就又係賴落去遺傳到近視，但我阿爸無近視阿媽就廿幾歲先，又唔知點解得我遺傳到近視，兄弟姊妹又無噃。醫學根本就解釋唔到。有興趣可以自己睇下維基 https://zh.m.wikipedia.org/zh-hk/%E8%BF%91%E8%A6%96

4. 上一篇介紹過一本由香港視光師梁彥康及記者韓柏新寫嘅書《你戴錯眼鏡啦》，當中第五章就拆解呢個科學上嘅亂噏嘅理論。根據作者參考多份研究報告，都睇到其實學歷越高，近視嘅比率就越高。作者都有一個網頁《預防近視網》，網址 http://www.chinamyopia.org 。而佢嘅預防方法就係霧視法，下次再講。

5. 眼鏡呢項偉大嘅發明，好可能就係被喻為繼火和車輪之後，第五項最重要的發明。位於威尼斯北部一間叫Murano玻璃工廠於13世紀的發明清晰薄滑嘅鏡片問世到18世紀初期真正可以戴在頭上嘅眼鏡問世後，幫到好多人解決視力嘅問題。但因為現代眼鏡可以戴住全日都唔使除，變成依賴眼鏡嘅問題出現了。鏡片/眼鏡嘅歷史可以睇下蔡司鏡嘅網頁https://www.zeiss.com.hk/vision-care/zh/better-vision/understanding-vision/the-history-of-glasses.html

6. 當然我並不反對眼鏡嘅供獻，所有嘅工具用得其所對人類幫助好大的。如果你有近視，要揸車嘅話，就一定要戴返眼鏡。返學上堂嘅時候，睇唔到黑板，都要戴返眼鏡。所以係十分有用的。

7. 作者發現近視嘅原因，好可能就係依家醫近視(其實都唔叫醫，可能激光先係醫，係吊命。好似膝頭差就換個骹咁，濕疹就狂開類固醇咁。其實呢啲我極不認同，除非去到有生命威脅就例外。都話呢個唔係醫學網頁，有機會先講)嘅主要手段--- 眼鏡。但濫用眼鏡就會變成作者講嘅近視惡化嘅主要原因之一。當有得依賴既時候，人就會懶，眼都一樣。第六章就講只要第一次戴上凹鏡(近視)眼鏡，近視就會越來越深。作者之一係視光師亦開左間眼鏡店，竟然倒自己米，叫人唔好戴近視鏡，成件事係咪好反智呢。所以佢既可信度好高，我就好敬佩呢啲人。所以咪我又試下分享，香港講呢樣嘢既人真係唔多，係咪香港大部人係咪都迷信權威，醫生講就無需要懷疑呢?醫生話戴兩個口罩有用，個個月打支針就百毒不侵，但之前又唔係咁講。如果你覺得近視係無得醫(其實真係無得醫，因為我嘅認知，近視唔係病黎的,無病又點醫)嘅，成世都係咁，只會越來越深，一切都係理所當然，係咁我都幫你唔到？

8. 我自己就小學時發現有近視，老爸就帶左我去配左副第一副眼鏡，好似一百度左右，實數唔記得了，副眼鏡盛惠港幣八百幾蚊!! 當時係1989-1990左右，對當時屋企黎講簡直係癲價。你睇眼鏡業塊餅幾咁大幾咁好搵。後續既發展應該好多人都一樣，每隔兩三年就會去驗下眼，就會發現深左幾多幾多，又要換副深啲既眼鏡喇，視光業多謝晒你嘅供獻。我就好彩因為窮，眼鏡好多年都唔換，最終上到中學大學都只係五百度。我識好多人都已經去到八百度一千度都有。

9.講到尾就係近視眼鏡令到我越來越依賴，瞳術倒退，近年先覺醒。諗返自己幼稚園時，小學一年級時，其實我都係無近視既。造成自己瞳術倒退既原因，說穿了就是用眼習慣。

＃近視原因 ＃近視眼鏡 ＃凹鏡鏡片

https://www.facebook.com/近視恢復法-水鏡森美-112716571467967/

我成功脫掉戴了30年的六百度眼鏡

 1. 「望着天一片，那雲霧，藏着美麗故事。望着花開遍，可知道，人生美妙。」唔知仲有無人記得呢個眼鏡88喺1992年嘅廣告。改篇自梅艷芳嘅「似水流年」。可以呢度睇返 http://youtube.com/c/TPBHKCM

2. 是咁的。我已成功脫掉眼鏡，唔係因為我戴左隱形眼鏡，或者乜乜乜激光（自殘嘢我唔做的），原本最高峰時接近 600度近視。我在小學一二年級時就已經開始戴眼鏡。那時是學校學童保健檢查時發現有近視，再轉介左我去盲人輔導中心 。細個時聽到個名，嗰時以為真係會盲，好彩原來唔會。

3. 我是如何減掉近視的？其實現在並唔喺無晒近視，當然標題係吸下精講到好神咁，但應該仲有一百度左右。散光還是有的，幾多度我就唔識量化。原本散光係一百左右，依家係明顯低左嘅。依家都一路keep住減低緊，有時真係可以清到帶住眼鏡咁。

4. 我諗都有好多人都聽過一個大法叫《貝茲法》，英文叫 Bates' Method。呢個唔係法輪大法，佢係將正常嘅眼睛活動方式整理好，將佢變成理論。但係你睇下維基，當時20世紀初192x 年，佢中途嘅研究過程當然有不少錯誤，俾其他人插到飛起。到依家都仲係俾人當做傻仔。呢個大法慢慢再講，等唔切就可以去賢哥改善視力個網頁，我認識點減近視都係因為賢哥無私嘅分享。

5. 另外仲有一個少啲人聽過嘅叫霧視法。我哋香港都有出過本書叫《你戴錯眼鏡啦》就有提出過戴近視鏡係導致近視嘅幕後黑手，作者係一個香港土生土長嘅視光師。嘿嘿，係咪好似好玄呢，有機會又講下。

5. 我開始研究減近視嘅方法，事緣幾年前我去剪頭髮，坐埋位第一樣嘢梗係除眼鏡，就剪完嘅時候，就拎塊鏡照後面問你O唔 OK喇。我諗睇得呢度嘅讀者都有呢個經歷。我就答佢話我無帶眼鏡睇唔到噃，咁佢先遞返俾我。後尾就就問我，哥仔你幾度近視，我答佢我5百幾度。佢就笑淫淫咁話，我以前都有500度近視，不過依家唔使戴眼鏡喇。我心諗，咁神。不過大家都應該估到，原來佢係做左激光。自此我就係度諗會唔會有唔使用呢啲有入侵性嘅方法呢？就係咁，當然喺上網搵，睇睇下就睇到賢哥嘅網頁喇。

6. 所以依家我想將一路嘅過程，寫返低佢，發揚光大咁，希望可以普渡眾生。當然呢個唔係醫學網頁，我亦唔係讀醫嘅，只是一隻IT狗。當然一兩篇係講唔晒嘅，好多嘢。戴定頭盔先，呢度只是分享我嘅個人體驗，並不是醫學網頁，講嘅嘢肯定係錯漏百出，不過我好認真的。當中各位有咩損傷嘅話本人絕不負責，亦都無錢賠，自己衡量下。掌聲多嘅我就可能有多啲動力諗到新嘢分享出黎。

#貝茲法 #減近視 #霧視法 ＃脫掉眼鏡

https://www.facebook.com/近視恢復法-水鏡森美-112716571467967/